İspaniya La Liqasının lideri “Barselona” 28-ci turda xal itkisi ilə yadda qalıb.
Komanda “Nou Kamp” Stadionunda “Jirona” futbolçuları ilə görüşüb. Qarşılaşmada ilk təhlükəli vəziyyəti qonaqlar yaradıblar. İkinci dəqiqədə Viktor Tsiqankovun zərbəsi qeyri-dəqiq alınıb. Az sonra kataloniyalılar hücuma cavab veriblər. Robert Levandovski topu cüzi fərqlə qapının üstündən çölə vurub. Az sonra “Jirona” futbolçuları kobud səhvlə diqqət çəkiblər. Müdafiəçi Santyaqo Bueno qapıçı Paulo Qassaniqaya ötürməsi zamanı kobud səhv edib. Boş qapıya doğru gedən topu məhz Qassaniqa dəf etməyi bacarıb. Qalan vaxtda da tərəflər təhlükəli vəziyyətlərlə yadda qalsalar da hesab açılmayıb. 0:0. Bununla da, “Barselona”nın La Liqadakı 4 oyunluq qələbə seriyası başa çatıb. Komanda 72 xalla liderliyini davam etdirir.